Silence of the Stones [Hindi]

Ekdin paharon mein gayee thi achanak

Ek lambi sadak par chalte chalte

Ruk kar, do pal gawai thi achanak

Kahaniyan to kayin likhi gayi hai  In paharon ke , in vaadiyon ke

Par unki khamosh shayari ko dekh kar

Usdin,

Bezuban ho gayi thi achanak. 

Peele pattharon ke qile ke peechhe

Dubte suraj ke angaar dikhe the

Hare paharon ke mahalon ke beech mein

Nili nadi ke dhaar dikhe the

Aasmaan ke taraf mur gaya tha rasta

Jaane kahan le gaya tha rasta

Paharon ke ek choti ko chhukar

Vaadiyon mein kho gaya tha rasta

Kuch deewane se dost bhi to the

Deeewana sa ek yaar bhi tha

Dher sari hansi mazaak thi

Dher saara ehsaas bhi tha

Par paharon ne rok li humko

Bhula diya manzil ki khoj

Dhoondhla hota gaya waqt tab

Dhoondhli hoti gayi hosh

Tab kahani sunayi di thi ek aur

Lal pattharon mein goonjta hua

Dhun sunayi di thi ek aur

Hazaron saal purane un khandaron mein

Ghoomta hua waqt ki rooh dikhai di thi ek aur

Na jaane use kaun sadi se

Ek zubaan ki talaash thi

Pattharon ke in zanjeeron se

Azaadi ki talaash thi

Adhi kahani sunaidi thi mujhko

Adhi kahin to kho gayi

Dhun jo kanon tak na pahunchi

Dil mein kahin to reh gayi …

Jab dhundh hati aur raat chari

Hum who tila chhor kar aye the

Us pal ke us ehsaas ko

Usi ret par chhod kar aye the

Par abh  jab din dhalne par

Raat ki chand nikalti hai

Kabhi kabhi un paharon ki

Yaad achanak lati hai

Kahaniyan to bohot sune hai

Un patthar aur un vaadiyon ke

Par unki khamosh shayari dekh kar

Jab hum khamosh ho gaye the.